Grunneger Bouk

 
 

Stichting t Grunneger Bouk is opricht in december 1974. t Doul is t bevördern van de oetgifte van - en t aanpeerdjen van de belangstellen veur - bouken en aander publikoaties, schreven in t Grunnegs of n aander Nedersaksisch dialect, of (as ze betrekken hebben op stad en/of pervinsie Grunnen) in t Nederlands.

Der binnen roem 2300 begunstegers en abonnees, dij vief moal in t joar t blad Toal en Taiken toustuurd kriegen mit biedroagen over culturele, historische en toalkundege onderwaarpen, verhoalen en gedichten in t Grunnegs, informoatsie over nije bouken en zo meer. Aal joar wordt aan de begunstegers vergees n nij Grunnegs bouk toustuurd.

Bie de stichting is De Boukenkist onderbrocht mit Grunneger bouken en spaigelploatjes en bouken in t Nederlands over de haile pervinsie. Dij worden ook oetstald op de joarliekse Dag van de Grunneger toal in meert, dij holden wordt in t gebaauw van de Grunneger Archieven in Stad.

In 1985 het de stichting de K. ter Laan-Pries insteld, dij t/m 2014 joarlieks oetlangd is aan lu en organizoatsies dij zok verdainstelk moakt hebben veur de Grunneger cultuur. Vanòf 2016 wordt de pries twijjoarlieks oetlangd.

Stichting t Grunneger Bouk is vestegd in t Grunneger Cultuurcentrum, Stationsstroat 11/b, 9679 EA Scheemde (Bedrijvencentrum Oldambt), telefoon (0597) 591135, e-mail: info@grunnegercultuur.nl

Welkom in de wereld van t Grunneger Bouk